រូបចម្លាក់ថ្ម ឬចម្លាក់ក្បាច់ផ្ទាំងសិលា ដែលធ្វើពីថ្មភក់ កំពុងមានទីផ្សាខ្លាំង ដែលអតិថិជនភាគច្រើនជា មន្ត្រីធំៗ ឬអ្នកមានទ្រព្យច្រើននៅរាជធានីភ្នំពេញ ដែលគេទិញយកទៅដាក់តាំងក្នុងបរិវេណភូមិគ្រឹះ ឬដាក់តាំងនៅតាមស្ថាប័នរដ្ឋនានា នេះបើតាមការអះអាងរបស់ជាងចម្លាក់ថ្មដ៏ល្បីម្នាក់នៅខេត្តបាត់ដំបង។
និងកូនជាងកំពុងឆ្លាក់ នេះគឺរចនាឡើងតាម ក្បាច់ខ្មែរបូរាណទាំងអស់ ពុំមានលាយឡំវប្បធម៌ប្រទេសជិតខាងនោះទេ ។
នៅក្នុងការដ្ឋានចម្លាក់ថ្មដែល ឃើញមានដុំសិលាធំៗ មានទម្ងន់រាប់សិបតោន ដាក់រកេតរកូតពេញទីធ្លីចង្អៀតមួយក្នុង កាដ្ឋានចម្លាក់របស់ខ្លួន ជាងចម្លាក់រូបនេះប្រាប់ថា ដុំសិលាធំៗនោះជាប្រភេទថ្មភក់ដែលលោកទិញពីខេត្តព្រះវិហារមក ដើម្បីធ្វើការឆ្លាក់ តាមការកម្មង់របស់អតិថិជន។ លោកបញ្ជាក់ថា ថ្វីបើតម្លៃផ្ទាំងថ្មធំៗដែលឆ្លាក់រួចលក់ទៅអោយឈ្មួញ មានតម្លៃរាប់ពាន់ដុល្លារក្នុងរដុំៗក៏ពិតមែន តែវាក៏ត្រូវការចំណាយពេលរាប់ខែ និង ត្រូវមានការអត់ធ្មត់ខ្លាំងក្នុង ការឆ្លាក់រូបរឺក្បាច់រចនាផ្សេងៗលើផ្ទាំងថ្មទាំងនោះ។
ក្នុងសម្លៀកបំពាក់ប្រឡាក់ដោយកំទេចថ្មដែលហុយធ្លាក់មកលើខ្លួន កូនជាងម្នាក់ក្នុងចំណោមបីនាក់ យុវជន សឿម ឈុនលី អាយុ២៥ឆ្នាំ បានទាញទម្លាក់ម៉ាស់បិតមុខចុះបន្តិច រួចនិយាយថា ចម្លាក់ក្បាច់និងឆ្លាក់រូបនេះមិនងាយស្រួលនោះទេ « ខ្ញុំបានដឹងថា ការឆ្លាក់ក្បាច់នៅលើថ្ម មានការលំបាកខ្លាំងណាស់ ព្រោះទម្រង់ក្បាច់រចនារបស់ខ្មែរ មានច្រើនបែប ច្រើនយ៉ាង តែខ្ញុំចង់ចេះវា ។ សព្វថ្ងៃខ្ញុំអាចឆ្លាក់ក្បាច់រចនាខ្មែរ ស្ទើរគ្រប់ទម្រង់នៅលើផ្ទាំងសិលាផ្សេងៗ តែខ្ញុំមិនជំនាញឆ្លាក់នៅលើឈើទេ »។
ទីតាំងចម្លាក់ថ្មខាងលើនេះស្ថិតនៅក្នុងផ្ទះផ្ទាល់ខ្លួនមួយ ដែលមានទីធ្លាតូចចង្អៀត ស្ថិតនៅក្នុងភូមិ កំពង់ពិល ឃុំវត្តតាមិម ស្រុកសង្កែ ខេត្តបាត់ដំបង ។លោកសឿម ប៊ុនធន បានបញ្ជាក់ថាមុននឹងលោកមកឈរជើងបើកអាជីវកម្មនៅទីនេះ នៅក្នុងអំឡុងឆ្នាំ២០០៣ លោកបានទៅស៊ីឈ្នួលឆ្លាក់រូប និងឆ្លាក់ក្បាច់ផ្សេងៗឲ្យថៅកែជនជាតិថៃនៅប្រទេសថៃជាប់ព្រំដែនខ្មែរ និង ម៉ៅការតពីជនជាតិថៃ រហូតដល់ឆ្នាំ២០១៥ ទើបគាត់ត្រឡប់មកបើកអាជីវកម្មនេះដោយខ្លួនឯង នៅស្រុកកំណើតក្នុង ខេត្តបាត់ដំបង ដល់បច្ចុប្បន្ននេះ។
មេជាងរូបនេះបន្តអោយដឹងថាជំនាញចម្លាក់ថ្មនេះលោកមិនបានចូលរៀនពីសាលាវិចិត្រសិល្បៈផ្នែកចម្លាក់រឺសូន្យរូបអ្វីនោះទេ ហើយពូជពង្សរបស់លោក៏មិនដែលប្រកបរបរនោះនោះដែរ ប៉ុន្តែការចេះចាំរបស់លោកគួបផ្សំនិងដុងពីកំណើតនិងការ អត់ធ្មត់ព្យាយាមផងនោះ គឺលោកបានទទួលចំណេះនិងបទពិសោធន៍បន្តពីបងថ្លៃរបស់ខ្លួនដែលគាត់ជាងចម្លាក់ថ្ម និង ចម្លាក់ក្បាច់ដ៏ខ្លាំងម្នាក់ ។
ទោះបីយ៉ាងណាជាងចម្លាក់ថ្មដ៏ល្បីរូបនេះ ក៏បានទទូលស្គាល់ដែរថាថ្វីបើការចេះចាំមុខជំនាញឆ្លាក់ថ្មនេះ លោក មិនបានឆ្លងកាត់ «សាលា» ត្រិមត្រូវតាមក្បូនខ្នាតមែន តែលោកហាក់ទទូលបានជោគជ័យក្នុងអាជីពជាងចម្លាក់នេះ។ ព្រោះបច្ចុប្បន្ន មានអតិថិជនជាច្រើន បាននិងកំពុងកុម្ម៉ង់ទិញរូបចម្លាក់ ឬ ផ្ទាំងសិលាចម្លាក់ក្បាច់រចនា ឬ សិលាចារឹកផ្សេងៗពីលោក យ៉ាងច្រើន ដែលធ្វើអោយជីវភាពគ្រួសាររបស់លោកធូធារល្អប្រសើរជាងមុន ។
លោកប៊ុនធន ក៏មិនភ្លេចអំពាវនាវសុំឲ្យប្រជាពលរដ្ឋខ្មែរជួយគាំទ្រដល់ស្នាដៃ និងជួយលើកទឹកចិត្តដល់ ជាងចម្លាក់ក្បាច់បុរាណខ្មែរនានា ដែលកំពុងប្រឹងប្រែង ស្ទើរគ្រប់រូបភាពនាសម័យនេះ ដើម្បីរក្សាកេរ្ត៍ដំណែលបុព្វបុរសខ្មែរយើងអោយ កាន់តែរុងរឿង ។
No comments:
Post a Comment